O lea o le a atoa le vaiaso talu ona tulai mai le faalavelave i Sinamoga lea na aafia ai se alii talavou 21 tausaga le matua a e lei maua lava le taavale lea o loo masalomia na aafia.
O le taavale rent o le ituaiga o le Vanguard uliuli o loo masalomia.
O le itula e 11 na tulai mai ai le faalavelave lea e tusa ai ma faamaumauga a leoleo, na agai atu i Sinamoga ma faapā ai se laaumalosi ma aafia ai le alii talavou.
Faaalia e le sui komesina o leoleo, Papalii Monalisa Tia’i Keti, e tele lava ni faamatalaga ua oo atu, ma ua mae’a foi ona agai iai le ofisa peitai e lē o iai lava se tasi ua molia.
O lea foi faalavelave ua tutufaatasi ai le afioaga o Sinamoga ma mataitū lelei o latou tuaoi ina ia mautinoa le saogalemu o aiga uma o le afioaga.
O se taimi muamua lea ua tulai mai ai se faalavelave faapea, ma ua faaleo ai ma atugaluga a le Matagaluega o Leoleo i le tulaga ua oo iai soligatulafono.
O le fautuaga lava a le Matagaluega ia tautuana le saogalemu o tagata uma aemaise o tupulaga talavou.
