O le moetolo ae uma ane ai ua fai tauiviga ma i’u ai i le maliu o le tina Kaikohe.
O le talitonuga lea o leoleo e tusa ma le ripoti lata mai na tuuina mai ananafi e faatatau i le maliu o le tina ia Linda Woods, 71 tausaga le matua lea na fasiotia i lona fale i le po o le Aso Tofi o le vaiaso talu ai ina ua tē’ia le alii o lea lava e lei maua.
O le fale o le aiga na osofai e na o tamaitai ma le tina matua e nonofo ai ma e faapea na maua atu o loo lafi le alii lenei i totonu o se tasi o potu.
Sa taumafai le fanau ma le tina matua ua uma lona soifua e tauivi ma le alii e faapea e tusa ma le 40 ma ona tupu tausaga le matua, ma e tigaina manu’aga o le tina matua.
O lea foi na tatoso ese e le alii fagaau sa faamānava ai le tina ua maliu, ma o se tasi o tagata matua e faamamā lona toto.
O le tigaina tele o manu’aga nei o le tina na uma ai lava lona soifua i lea po.
I se faamatalaga mai leoleo o lē o loo sailia pea na oso ae tia’i ona seevae tosotoso faapea ai ma lona ofuvae, ma a o tau sailia ai pea ua faamatalaina o foliga o se alii Maoli poo se Polenisia.
E le o faigofie i alo o le tina ua maliu le mea ua tupu aemaise lava i lana fanau teine sa iai i lea po.
