E lei manuia le taaloga muamua a le Manu Samoa i le taamilosaga a le Pacific Nation Cup e pei ona taaalo ai ma le ‘au malosi a Fiti i le faai’uga o le vaiaso i le malae o le HFC Bank Stadium i Suva.
O Samoa na sili o latou ‘ai i le ‘afa muamua i le 16 i le 15 a Fiti.
O le sikoa na maua e le uigi saoasaoa le alii o Pisi Leilua ma kiki sa ova i le pou mai le numela sefulu le alii o Alai D’Angelo Leuila lea na maua ai ‘ai o Samoa e 16 i le ‘afa muamua.
Na faate’ia lagona o le atunuu ma le tapua’iga i le manaia o le osofa’iga sa iai le Manu i le amataga o le taaloga.
Ma sa iai foi le talitonuga o le tapua’iga a le atunuu e taotao ai i’i le malosi o le Manu i le ‘afa lona lua.
Peitai ane, na suia atoa e Fiti lagona o le aumatamata ina ua toe amata le ‘afa lona lua, ae poloka ai loa e Fiti le toe tau ‘ai o le Manu Samoa.
E amata le ‘afa lona lua ae sui mai le sikaili a Fiti e ala i le faamomo’e o ana tama saoasaoa ma o lea na sosoo ai a latou sikoa i le ‘afa lona lua ae ua lē toe tau ‘ai ai le Manu Samoa.
E mae’a ane le taaloga ua 42 Fiti i le 16 a le Manu Samoa, ma e foliga mai e 27 ‘ai o Fiti na toe maua i le ‘afa lona lua o le taaloga.
O le faai’uga o le vaiaso o le a taaalo ai le Manu Samoa ma le ‘au a Tonga i le Apia Park.
E ono ‘au o loo iai i lenei taamilosaga e aofia ai Fiti, Manu Samoa, Tonga, Amerika, Canada ma Iapani.
