Foliga mai o le a alualu ai lava faapea suiga faatatope i faigamalaga a trains i Aukilani, faapea ai ma le saoasaoa faatapulaa.
E 19 isi faigamalaga i le va o le itula e 3 agai i le itula e 6 i le afiafi ananafi na lē taunuu e mafua i suiga o le saoasaoa o trains ua faia nei e le KiwiRail.
O fesuiaiga nei ananafi na umi ai le va o faigamalaga a trains, na suia mai le ta’i 10 minute na faatalitali ai tagata feoai agai i le 20 minute.
Na fai mai ai ma le Auckland Transport o le a lē gata i le vaiaso nei, ae o le a faaauau atu i le masina fou fesuiaiga nei i taimi o faigamalaga a trains ma faigamalaga lē taunuu.
O lea ua uma ona tusi le pulenuu ia Wayne Brown i pule o le Auckland Transport, KiwiRail lea e vaaia auala trains, ma le pulega o trains le Auckland One Rail ma faailoa iai lona faanoanoa tele i le tuta’ia soo o malaga a trains i Aukilani, toe tautuu’ai e le isi pulega le isi i taimi e aliae ai se faaletonu.
Ua faatalosagaina foi e le pulenuu pule o pulega nei e tolu e faia se latou fono ma valaaulia ai ma le minisita o femalagaiga, Simeon Brown.
