E le o toe tele ni masina ona faagata lea o le faia o pepa faatumu mo le vaega o tiute e pasese e taunuu mai fafo, ae o lea o le a suia agai i le faiga e pei ona sa fai a’i pepa faatumu o le Koviti.
O Passenger Arrival Cards nei o loo faaaogaina e pasese e faimalaga mai isi atunuu e faailoa ai meatotino ma meaai o loo omai ma aumai ma o lea o loo faatumu uma e faaaoga ai le peni ma le pepa.
Peitai o lea ua sau tala mai le vaega o tiute o le aso 30 o Iuni o le a amata faatumu ai online ma o loo iai foi fuafuaga o le faia o se app e mafai ai ona faia ai i luga o telefoni.
O se suiga o loo galulue faatasi ai le vaega o tiute ma le matagaluega o pisinisi mo le Immigration a Niu Sila, matagaluega a le soifua maloloina, matagaluega o femalagaa’iga faapea le biosecurity a Niu Sila.
O se galuega fai faatasi a matagaluega nei e fā ina ia mafai ai ona maua e le vaega o tiute le faatagana e faaaoga ai le faiga sa faia a’i le Traveller Declaration poo pepa faatumu sa faamalosia i taimi o le Koviti.
O lona uiga o le a lē toe tufaina atu e le aufaigaluega a le vaalele pepa faatumu ma e tatau ona faatumu a o lei feiloai ma le sui o le vaega o le tiute i le taimi e siaki ai ato i le malaevaalele.
E le o iai se suiga i faasalaga pe a faamaonia e pepelo tautinoga o loo faia i luga o pepa faatumu nei.
