E lē toe pale le vaega faaupufai e puipuia aiātatau a tagata i le pulega o le Malo, pe a lē suia le ta’ita’i e toe tapena lelei ai le pati faaupufai mo le isi palota tele a Samoa i le tausaga 2026. Ua faailoa lea finagalo o le sui faipule o Faleata 4 le tofa Ale Vena Ale, i le tuana’i o se faatalanoaga ma le tofa i le Igoamatua ma ia faailoa ai lona fia tuua o le vaega faaupufai sa iai i lona faato’ā faavaeina a o talavou lona soifua.
Faaalia e Ale e tele galuega lelei sa faia e le susuga Tuilaepa L Sailele Malielegaoi, a o avea ma ta’ita’i mo le 20 ma ona tupu tausaga aemaise foi o lona tofi faipule ua avea ai o ia ma se tasi o sui sinia o le Palemene ua 40 tausaga o tulai i le tofi o lona itumalo.
Ale: “O lo’u manatu a ia, o a’u ou te faaaloalo tele i le afioga ia Tuilaepa. Ae ou te manatu ua uma lona taimi. A alofa Tuilaepa i lana vaega faaupufai ua 23 tausaga o ona ta’ita’ia, ua 40 tausaga o avea ai o ia ma faipule, e tatau ona ia see ese faatuagalu, e faufautua i le pati, ae ua tatau ona iai se isi ta’ita’iga fou o le vaega faaupufai.”
Se faatalanaoga ma le sui faipule o Faleata 4 o se tasi o sui faavae o le vaega faaupufai e puipuia aiātatau a tagata le tofa Ale Vena Ale.
