E lē o nofonofo le ta’ita’i ua iai nei o le vaega faaupufai o le Faatuatua i le Atua Samoa ua Tasi ma se vaega to’atele o sui faipule o lea pati faaupufai, i le tapena o se finauga faaletulafono e tuuina atu i le faamasinoga i le faamoemoe autū, e aveesea ai le Palemia ma minisita o le Kapeneta poo le Pulega Faatonu o le malo.
E pei ona silafia ua mae’a lafo e lua o le lē faatuatuaina sa autū lava i le faamutaina o le pulegamalo o le malo mai le sui faipule o Lotofaga o loo tauaveina le tofi Palemia le afioga Fiame Naomi Mataafa ma minisita o lana Kapeneta, ua teena e le Palemene.
O le ave i le faamasinoga o lea finauga e lē o nofonofo ai foi le ta’ita’i ma lea vaega faaupufai i le tapena i le tala o le tupe autū mulimuli a le faigamalo a le Faatuatua i le Atua Samoa ua Tasi, ua faamoemoe e faataatia i le Palemene i le faai’uga o le masina fou o Me.
O le faapa’ūina o le tala autū o le tupe pe afai e tupu lea tulaga, o le tuuina atu o se isi lafo o le a finau ai le lē faatuatuaina o lea tapenaga tau tupe a le faigamalo.
O nisi o mataupu ua folasia nei e le susuga Laauli ma sui faipule o le faafaletui o lana vaega faaupufai e to’a 20, ua faitioina ma fesiligia ai le Pulega Faatonu o loo faafoe e le Palemia ma le Kapeneta, ma ua faaalia ai se finagalo o le ta’ita’i o le Itu Agai i le feiloa’iga masani ma tusitala ma ia fautuaina Laauli e lē o latou o se itu o agaia le malo.
Ae i le tāpā e tusitala o se finagalo o le susuga Laauli Leuatea Polataivao Fosi Schmidt i lea tulaga, na ia faaalia ai, e iai foi le pitolaau a lana vaega faaupufai e fesiligia ai le faigamalo to’aitiiti le minority government.
Le ta’ita’i o le vaega faaupufai o le Faatuatua i le Atua Samoa ua Tasi, susuga Laauli Leuatea Polataivao Fosi Schmidt i le feiloa’iga ma tusitala.
