E sese lipoti o faamaumauga mai le ofisa o leoleo e faatatau i osofaiga a gaoi o loo faaaoga ai taavale e faaleaga ai faleoloa poo ram raids.
O se mataupu ua toe fesiligia ai nei faamaumauga o loo faailoa mai e le malo i tagata lautele e pei ona sa iai foi lipoti sese na faasalalau e le soifua maloloina e faatatau i EDs poo emergency department.
O le vaiaso ua te’a o le soifua maloloina na aafia i lea faaletonu ma o lea lava e lei toe faasa’oa, ae o ananafi o leoleo.
Ua toe tautino ai leoleo e sese faamatalaga na faalauina mai i lipoti.
I se lipoti a le Newshub o loo toe ta’ua ai e toeititi faatoluina le aofai o loo lipotia faatoa maua faamaumauga sa’o sa tatau ona iai.
A o avea ai Chris Hipkins ma minisita o leoleo ia Aokuso o le tausaga faatoa mavae atu, na sau ai lipoti mai lona ofisa e 67 ram raids peitai ua toe iloa nei o le aofaiga sa’o e 116.
O nisi foi o lipoti na fai mai ai i le masina o Oketopa e 26, ae ua toe maua nei i faamaumauga sa tatau ona 76.
