I le mae’a ai o le 6 vaiaso o faatino le polokalame e faasino i tamaitai talavou 18 i le 25 tausaga na taualuga ai i se faaaliga e faaalia ai le tāua o lenei faamoemoe.

O lenei faamoemoe sa faataunuuina lea i le nofoaga o tu ma aganuu faaSamoa i Malifa na molimauina ai le toatele o le mamalu o le atunuu e maimoa i taleni a tamaitai na auai i le polokalame ua ta’ua o le Anofale.

O le Pule Sili, Anthony Seuseu a le kamupani telefoni Digicel Samoa o loo lagolagoina malosi lenei polokalame ma saunoa i le tāua i tamaitai talavou i lo latou ola tuputupu a’e.

“I le faagasologa o lenei polokalame mai le amataga na faaalia ai le tāua tele o le sao o tamaitai i totonu o aiga o le lumanai lea i aso oi luma.”

“O le aano o le anofale o le tamaitai Samoa, oute manatua ai si ou tina ma tina uma o i latou lea o le sootaga o tatou i o tatou faasinomaga i aiga, nuu male atunuu.”

“O lenei foi polokalame o se taulogologo lea mo i tatou uma ina ia teufatu le tāua o a tatou tu ma aganuu faa-Samoa.”

“Poo fea lava le tafa o le kelope o loo tatou iai ia o tatou manatua lo tatou tupuaga ma faasinomaga i lo tatou atunuu.”

E 40 tamaitai na talosagaina le fia auai ai i lenei polokalame ma nisi o tamaitai mai atunuu mamao ae peitai na lē mafai ona auai mai.

O lenei fuainumera e iai tamaitai o loo galulue i soo se matata faapea ai ma nisi o loo a’otauina i Kolisi ma Iunivesite.

E 60 mentors poo i latou na avea ma faiaoga a o faagasolo le polokalame, o i latou foi nei o tina ma tamaitai o loo umia tofiga maualuluga i le Malo, faalapotopotoga tuma’oti, pisinisi, taaloga aemaise o nisi ua maualuga lo latou sao i le atina’eina o le tamaoaiga o le atunuu.

O nisi o taleni na faaalia o taleni a nisi o tamaitai sa pale mai i tauvaga tausala a le Pasefika faapea ai ma le tausala o Samoa i tausaga ua mavae ma na vaaia ai le lagolago a nei tamaitai e ui ina aumau i atunuu mamao.

O tausala na auai e aofia ai le tausala o Samoa i le tausaga 1994 Lili-o-le-Vao Malietoa Thomsen, Seiuli Verona Lovel Ah Ching Parker tausala o Samoa ma o le uluai tamaitai Samoa na pale mai i le tausala o le Pasefika 1996, Janine Nicky Tuivaiti tausala o Samoa ma le tausala o le Pasefika 2012 ma nisi o tamaitai.