Ua faamautinoa mai e le Palemia o Niu Sila o le a lē taliaina le valaaulia a le Peresetene o Ukraine e alu atu i Kyiv.
A o iai Chris Hipkins i Europa i le vaiaso nei, o se faigamalaga o loo taulai uma i le sainiga o le maliega o fefaatauaiga saoloto i le va o Niu Sila ma le Iuni a Europa, poo le maliega lea e faatusaina i le $1.4 piliona i le tausaga e manuia mai ai le tamaoaiga o Niu Sila.
A mae’a ona toe malaga lea e feiloai ma le Palemia o Sweden poo se tasi o poutu i le maliega o fefaatauaiga saoloto ma le Iuni a Europa.
E taualuga i le fonotaga tele a le NATO lea e feiloai uma ai le toatele o taitai o atunuu eseese e talanoa le taua i Ukraine, ma o i o loo iai le faamoemoega o Hipkins atonu o le a maua ai se taimi e feiloai atu ai ia Volodymyr Zelensky.
O le faalua ai lea ona teena e Niu Sila valaaulia a Zelensky e pei ona iai foi i le tausaga talu ai ia Jacinda Ardern, ae mai ia Hipkins, o se malaga vave tele ma afai ae toe alu i Kyiv o lona uiga o le a faaopoopo isi aso.
O le faaiuga a le Palemia o Niu Sila e le alu i Kyiv, ua sau ai ananafi a o faamanatu le aso lona 500 talu ona faia le taua i Ukraine ma o lea foi ua ofo mai le malo tele o Amerika e na te sapalaia pomu ua ta’ua o cluster bombs mo Ukraine, poo pomu nei e faasā e le 120 atunuu e aofia ai ma Niu Sila.
