Ua ioe lē sa avea ma Palemia, o le taitai o le ituagai e iai le eseeesega o tulafono na pasia i le Palemene ma le tulafono na saini ai le Ao o le Mālō faasino lea i tulafono e tolu ua teuteu ai le faavae ma ua tuu mavaevae ai Pulega o galuega a le faamasinoga.
O le tulafono taufaaofi na soalaupule e le Palemene o loo iai aiaiga i le tofia lea o se Sui Peresetene o le Faamasinoga o Fanua ma Suafa o loo aiaia ai agavaa o se tagata e tofia e pei o le tatau ona galue o se tagata e iai tomai tulafono poo se loia mo le 13 tausaga. E tatau foi ona lē itiiti ifo o le 10 tausaga o umia se suafa matai ma fai lana tautua e tusa ai o tū ma aganuu o Samoa.
O le tulafono na saini ma faamaonia e le Loia Sili a le Mālō ma tuuina atu i le Ao o le Mālō mo lana faamaoniga ma saini ai lona aao e le’o iai se aiaiga faaletulafono e faatino ai faaletulafono le filifilia o se Sui Peresetene e tusa ai ma ia aiaiga.
O le vala lea na māua e le tamaitai Minisita o Faamasinoga ma ia fautuaina ai le taofia o le faatinoina o le filifiliga o se Sui Peresetene seia ma’ea ona tapena le aiaiga faaletulafono lea o loo nisi mai tulafono na saini e le afioga i le Ao o le Mālō ma pasia e le Palemene.
I le feiloaiga a Tusitala ma le taitai o le ituagai ia ave ai le tuualalo a le susuga Tuilaepa Lupesoliai Sailele Malielegaoi i le tamaitai Palemia ma le Faigamalo ia omiomi faaniualeale le faaletonu o lona fingalo e aoga mea tutupu.
Taua e Tuilaepa “Ou te manatu i lea faapenei e le polokiki ai seisi a iai ni lape faapenei o mea masani e omiomi faaniualeale i totonu o le Mālō ona e maaleale.
O lea na o’u faitau a’u i le tulafono o le mea lea ua tupu ua tele vave le faasalalauga a le Mālō, o la’u faitau o lae e faavae le latou le finagalo e faatau i le pili, lea na ave totonu e manatua foi e avatu o pe tulafono tau faaofi ona fai loa lea mo mea o faatalanoaga a le Palemene e tutupu mai ai isi manatu fou ona toe teuteu lea ma ave loa lea e saini.
O la’u vaai o lae tilotilo lē foi na, o’u te lē talanoa atu i le Palemia o le Palemia lea mulimuli i fautuaga, a’o le Ofisa o le Loia Sili e pei o le lā ua tilotilo i le pili ae ua lē tilotilo i le tulafono ma o tulafono tonu a lea, lea foi na faatautō ai ia Vui.”
Taua foi e Tuilaepa “O le mea la e tupu, afai la e sese le mea lea, e sese foi le faatautoga o Vui. O lea la ua laga na’o le tasi ae ua galo ai o le tulafono a lea na faatautō ai Vui ae e leai se upu ma agai iai o le ala lena o’u te faiatu ai o mea faapenei aua le polokiki ai aua o le mea lea Na aumai ua polokiki ai upu e faaleaga ai le faigamalo talu ai a lea la ua aliali mai i la’u faitau atu o lae e tilotilo i tulafono taufaaofi ae ua lē tilotilo lē na faia le faasalalau ga i el tulafono na pasi ma saini.”
O le mataupu i le eseese o le vaega o le tulafono na pasia e le Palemene ma le tulafono na saini ai le Ao o le Mālō o loo faia iai se sailiiliga i le finagalo o le tamaitai Palemia i le faaiuga o le tausaga ua tea nei sei saili poo fea na mafua mai ai le faaletonu a’o ai foi o loo i tua o le faaletonu.
