O le soona tausami i le fuamoa e foliga o le mafuaaga lea na ala ai ona fesiligia le siaki a le alii fusu o Conor Benn a o sauni ai mo le la fusuaga ma le alii o Chris Eubank Jr i le masina o Oketopa.
Fai mai na faia le siaki ma masalomia ai le faaaogaina e le alii fusu o se tasi o fualaau e faasā ona o ona aafiaga i le tino o le tagata ma ina ua taofia le faia o nisi siaki a Benn ona o le iuga o lana siaki lea, sa ia faailoa ai e i le va o le 35-40 fuamoa na te tausamia i le vaiaso ma e manatu o le mafuaaga lea ua aafia ai lana siaki.
Ua faailoa mai la i le asō ua kilia lea alii fusu i le mae’a o suesuega na faia, ma o le a toe faafoi i lona tulaga o iai i fusuaga i le lalolagi.
