E le o fia faatoese pe faamalulu ane le kulupu lea na faia sa latou solo tetee i luga o le State Highway1 i Ueligitone i le aso ananafi lea na matuai poloka ai le alatele ma faatuai ai le tele o faigamalaga.
Fai mai a latou o loo iai isi solo tetee o loo faatulaga ane mo le agai i luma.
E toafā le autetee na pue e leoleo i le aso ananafi ma ua lapataia e ono tu i le falepuipui mo le oo atu i le 14 tausaga i le falepuipui.
O le kulupu lea o le Restore Passenger Rail fai mai a latou o loo manaomia vave e le atunuu ni gaioiga e faia i suiga o le tau aemaise i le tele o le mau fesuiaiga i le tau ua vaaia i nei ona po.
Fai mai le latou faamatalaga e pei ona lipotia i le Newshub o le tetee o loo agai sa’o i le malo peitai ina ia silasila mai le malo i le latou finau, e mafua ai ona o latou faatupu tulaga ia e faalavelavegia ai le soifuaga faifaipea auā seiloga e faatino lea tulaga ona faatoa amanaia ane lea o le latou finau ma o le a lē taofia lava se’i vagana ua faalogo ane le malo.
