Ua mae’a nei galuega sa aveesea uma ai suāuu ma isi otaota leaga mai le manuao o le Manawanui o loo goto i ogasami i Saute o le motu o Upolu, ma ua faamuta ai ma galuega sa faatino e se kamupani sa aumai e le malo o Niu Sila latou te faia lea galuega.
O le aveesea uma o suāuu ua faaalia i se pepa o faamatalaga o le taunuuga lelei lea o le galuega sa fuafuaina i le aveesea o suāuu ina ia faatumau le saogalemu o le si’osi’omaga.
Faaalia e le ofisa sinia o le fitafita o le puipuiga a Niu Sila o Commodore Andrew Brown sa toe siakiina uma tane ma isi vaega o le manuao ma ua mautinoa ai ua leai se suāuu o toe iai i luga o le vaa.
E 55 tane sa oo iai lea galuega ae 10 tane e le’i mafai ona oo iai, ae ua faailoa e lea ofisa sinia o le fitafita o le puipuiga a lea malo o ia tane e lē o iai ni suāuu poo nisi vaega e lamatia ai le saogalemu o le si’osi’omaga ma le gataifale.
E 320,000 lita o suāuu kiso ua fefiloi ma le suāsami sa aveesea ae mai lea aofa’iga e 300 afe lita o le suāuu e mafai ona toe faaaogā na aveesea.
O le faamaumauga ua faailoa mai e 45 afe lita o le vai ua fefiloi ai suāuu kiso ma isi ituaiga o suāuu ua aveesea ma o le a toe faafoi i Niu Sila mo le sa’ilia o se nofoaga saogalemu e lafoai iai.
O Oketopa o le tausaga na te’a nei na pa’ulia ma iu ina goto ai le manuao o le Manawanui i ogasami i Saute o Upolu.
Sa faasaoina uma le auvaa ma o le vaiaso nei na tauaao atu ai e le sui o le fitafita o le sami a Niu Sila ni tusipasi ma pine i nisi o Malu o le Malo poo leoleo ma ofisa o le vaega o le tineimu ma galuega lavea’i i taimi o faalavelave faafuase’i, e amana’ia ai lo latou sao i le galuega sa lavea’iina ai le auvaa o lea manuao o le fuāvaa o le fitafita o le sami a Niu Sila.
