Ua iai nei le fuafuaga a le malo e lē toe faagaioia pisinisi laiti o loo i tafatafa ane o le maketi o i’a i Savalalo ma pisinisi laiti uma o loo i le itu i Sisifo o lea nofoaga.
O se tasi lea o nofoaga na osofa’i e leoleo i le vaiaso ua mavae ma maua ai nisi o pisinisi o loo tulei ma faatau atu ai fuālaau faasāina o le ‘aisa ma le maruana.
Ua faailoa e le Palemia i le feiloa’iga ma tusitala i le amataga o lenei vaiaso o le a toe faaleleia lea nofoiaga ma fausia fale faatali pasi fou e fuafua i le tatalaina aloa’ia o le maketi fou i Savalalo lea ua mae’a.
O se maota tele o fausaga faaonaponei ma ua faailoa e le Palemia ua ave lana fautuaga i le pulega o le maketi e tatau ona faamuamua avanoa mo tagata faipisinisi o loo fia maua se avanoa i lea maota fou ua faaigoaina o le Savalalo Market.
Le ta’ita’i o le malo afioga i le Palemia, susuga Laaulialemalietoa Leuatea Polataivao Fosi.
