Ua lagonaina e le tele o faalapotopotoga i itu Matu o le atunuu, le augani a le to’atele o tagatānuu o faaitu e pei o Kaikohe le sasao faafaama’i o tagata ua tagofia ma faaaogāina le pauta faasāina o le methamphetamine.
Ma ua faamatalaina e le to’atele ua pei o se vaisū i tagata ma ua avea ma se vaega ua moomia i le ola o le tagata.
I lipoti, ua faamauina, ua faatoluina le numera o tagata o le faaitu i Matu o Niu Sila, o loo tagofia le fualaau faasāina, ma ua avea ai Northland ma aai poo le laumua o pauta faasāina.
Ua ta’ua e nisi o auaunaga i le faaitu i Matu o Niu Sila e pei o le Te Hau Ora o Ngāpuhi, e lē o lava ni alaga’oa ma seleni e faatino ai le galuega e tali atu i lenei faafitauli.
Ua faamaonia foi i faamaumauga, le vaaitino ai o le tele o tagata galulue i lea auaunaga i le matua’i telē o le aafiaga o loo vaaia i aiga aemaise lava i fanauiti.
O loo faaopoopo atu lenei faafitauli i nisi foi mau faafitauli o loo fetaia’i ma le to’atele, e pei ona māua o loo feagai le to’atele ma faigatā o le lē lava o le faasoa, e lē lelei ma saogalemu fale o loo nonofo ai, ma le faatupula’ia o numera o fanau teine e ma’itō laiti.
Ae ua faalauiloa nei e le Resilience to Organised Crime in Communities a le malo nisi o a latou polokalame ua amata faatino e tali atu ai i le faatupula’ia o le numera o tagata o loo aafia i lenei mataupu, e pei ona ave ai le faamamafa i tupulaga talavou.
Ua faamauina foi le valaau ai e nisi o ta’ita’i o lea faaitu o le atunuu, e moomia le vave sa’ili o se fofō.
Ua tali foi le alii Minisita mo le Soifua Mālōlōina o le Mafaufau, Matt Doocey e ono fesoasoani tele le tuu atu o le seleni o loo maua mai le Crime Fund e taumafai e faatino ai galuega fai mo le tali atu i le maualuga o le numera o tagata ua aafia i fualaau faasāina.
Puna o Faamatalaga: https://www.rnz.co.nz/news/national/559898/northland-s-meth-crisis-there-s-no-magic-wand-for-any-of-this
