E $936,000 tala le aofaiga o se tupe tele ua su ai e lē sa avea ma Pule o le vaega o Auaunaga Lautele le Corporate Service a le Pulega o le Tineimu ma Galuega laveai i taimi o faalavelave faafuase’i, ona o le faaiuga na faia ile masina o Aukuso o le tausaga na tea nei, na faamuta ai le konekarate 3 tausaga na toe faafou ile tausaga e 2019.

O le autu o le mataupu lenei ua faaulu e Faafetai Alisi o se tamaitai sa umia le tofiga pule o le vaega o auaunaga lautele ona ua ia tuuaia le lē sa’o o le faaiuga na faamalōlō ai.

I pepa o faamaumauga o lenei tagi o se su, o loo faaalia ai e le ua talosaga o le taimi atoa na fautuaina ai o ia e le sa avea ma faauluuluga o le pulega i se suesuega ua faia faasaga ia te ia e leai ma se tulaga na faailoa atu ai poo a tuuaiga, ae na faatoā faailoa atu i se tusi a le Matagaluega o Tupe i se latou sailiiliga na faia ma le Matagaluega o Pisinisi Tumaoti a le Malo, o lona maua o ni tupe totogi mai ni itula faasili sa galue ai poo ova taimi o le mafuaaga lea o le suesuega.

Sa faailoa atu ai e ia Matagaluega a le Malo o aiaiga o lana konekarate e lē maua ai ni faamanuiaga tau tupe i itula faasili e faigaluega ai. Peitai o loo faaalia e lē ua tagi i lana talosaga mo se taui e totogi atu ona ua sēsē le faaiuga ua faamuta ai lana auauanaga, o loo aiaia ile konekarate le avanoa ona maua o ana faamanuiaga tau totogi i itula faasili e galue ai e ala ile tuuina atu o le ioega a le Ofisa Sili o le Pulega o le Tineimu ma galuega laveai i taimi o faalavelave faafuasei.

O le Komesina o sulufaiga, ma le Loia Sili a le Malo e avea ai ma sui o le Pulega o lea Matagaluega sa galue ai Faafetai Alisi o loo tuuaia i le tagi.