Ua faamatala e nisi o tagata faigaluega faavaitaimi mai le Atu Solomona o o latou totogi tai vaiaso e oo lava ina leai se mea e totoe ona o mea o loo toesea mai ai ma o lo latou manatu e le faatulafonoina ia tulaga.
O Lyn Soapi, Danny Lau ma Mary Lau ua faaulu nei sa latou tagi faasaga i le kamupani o loo faigaluega ai o le Pick Hawkes Bay Incorporated, e talosaga ai le toe totogiina ane o tupe poo arrears mai o latou totogi.
Ua faailoa o le latou mataupu o le a fofogaina i le faaiuga o le tausaga nei poo le tausaga fou foi.
E le taumate o se iuga o le a tuuina ane o lenei mataupu o le a ono faatulaga ai foi ma le faiga o nisi mataupu faapea i le lumanai, o le mafuaaga lea o le a fofogaina ai le mataupu i le faamasinoga o Galuega ae le o le faatali i le Employment Relations Authority.
O le Pick Hawkes Bay Incorporated o se faalapotopotoga not for profit ma latou te faafaigaluegaina tagata i lalo o polokalame a le RSE, o galuega faavaitaimi.
