Ua faatonu e le faamasinoga o palota le Resitala o le faamasinoga ina ia tuuina atu uma i le Loia Sili su’esu’ega o taualumaga sa faia e faasino i le tuua’iga o le tupe e selau afe tālā, sa tuua’ia ai lē na faasaga iai le tagi tau palota mai Falealili 1 i lona ave i le sui sa faauluina lea tagi i se taumafaiga e ave ai i tua le tagi tau palota.
E pei ona silafia o su’esu’ega na faia e le faamasinoga na tuuina atu ai se talanoaga na pu’e i le telefoni na faailoa ai le taulimaina e lē na faaulu le tagi o lea tupe.
O le Loia Sili o le a silasila i ia su’esu’ega ma faia se faatatau talafeagai i se gaioiga faaletulafono e ao ona faatino.
O le isi o galuega ua tuuina atu e le faamasinoga i le Loia Sili, o le silasila lea i le solitulafono o le lē migao i le faamasinoga poo le contempt of court, ma e faasino lea i molimau e le’i oo atu i le taimi na su’esu’e ai moliaga o le tagi tau palota, aemaise sa faia foi le poloa’iga e oo atu ai ae e le’i usita’ia.
O se tasi o vaega ua tuuina atu foi i le Loia Sili mo sana iloiloga talafeagai, o tala ma tuua’iga na faatūtū i le faamasinoga a o faagasolo ana galuega i le tagofia o le tagi tau palota mai Falealili 1.
