O le Aso Lulu o lenei vaiaso le ulua’i aso o le masina fou o Aperila ua fono ai le itumalo faapalota o Safata 2 e soalaupule ai le mana’o o le afio’aga o Vaie’e ina ia suia le patī faaupufai e lagolago iai lo latou tofi faipule mai le vaega e puipuia aiā tatau a tagata, i le vaega faaupufai o loo tu ai nei le malo le Faatuatua i le Atua Samoa ua Tasi.
I se feiloa’iga i le telefoni ma le afioga Tuia Pu’a Fuatogi Letoa o loo seei i le tofi o le itumalo ua ia faamaonia mai ai, le taloina o lea fono a Safata 2 e talanoaina ai le finagalo o lo latou afio’aga o Vaiee o se tasi o nuu o lea itumalo i le atu Safata.
O le fono a le komiti o le Fono Faavae a lea itumalo i le faai’uga o le vaiaso ua mavae sa folasia ai se finagalo o se tamālii o le itumalo palota o loo i totonu o le komiti ma ia momoli ai le mana’oga i le faipule e faamavae ma le vaega faaupufai o loo lagolago iai, e māfua i ni lafoga ua lē taugamalie sa tuua’ia ai e le ta’ita’i ma nisi o le vaega e puipuia aiā tatau a tagata lo latou faipule.
O le isi māfua’aga ua faatino mana’oga o le itumalo sa faananau iai le faipule ona o le poloketi o le atina’e manuia o itumalo.
E pei ona silafia o aiaiga o le tulafono o faigāpalota, a fia suia le lagolago a se sui faipule mai le patī sa auai i se isi vaega faaupufai, e faamavae ona faagafua lea o le nofoa o le itumalo ae toe filifili le itumalo i se faigāpalota laititi.
O Vaimauga 3 o loo tālia lana palota laititi e toe sa’ilia ai sona tofi faipule ona ua faamavae mai le vaega e puipuia aiā tatau lē sa seei i le nofoa e māfua lava i le suia o le vaega faaupufai ua fia lagolago iai.
