A itiiti mai e toasefulu gasegase mai lo tatou atunuu, ua faia iai le faaiuga a le Kapeneta e auina i fafo e saili togafiti ai, ona e le o mafai ona faatino ia togafitiga i Samoa.
Ua faailoa e le taitai o le Malo i le Palemia lea faaiuga ma o le a totogi i le polokalame a le Malo o loo ave ai gasegase i fafo atu o Samoa.
E ese mai lea faaiuga a le Kapeneta ua faailoa foi e le tamaitai Palemia le faagasolo ai o tapenaga a se komiti ua aofia uma ai auaunaga a le Malo, mo le faamoemoe i le taligamalo o le fono a taitai o atunuu o le Taupulega a Peretania tele, o se taimi muamua o le a usuia ai i se atumotu o le Pasefika lea o le a faia mai i Samoa i le tausaga fou.
Ua faailoa e le taitai o le Malo o le masina o Oketopa o le 2024 ua faamoemoe e faia ai lea fono tele faavaomalo.
O le fono muamua lea a Malo o le Taupulega ua faaao i le Tupu ua iai nei o Peretania le alii Perenise Lana Maiesetete le Tupu o Salesa III. O ia o le a malele e tatala le fono ma ua mautinoa o le a afio mai i Samoa mo le faatinoina o se tasi lea o ona tiute tāua i lona tulaga o le Faaao o Malo o le Taupulega, e pei ona sa faatino foi e lona tuaa tina sa avea ma Tupu ua tuumalo, o Kuini Elisapeta II.
O Novema o le tausaga na tea nei e pei ona faailoa e le Palemia le afioga Fiame Naomi Mataafa, na afea ai Samoa e le ofisa sinia o le ofisa o Malo o le Taupulega mo le asia o lo tatou malaevaalele, ma le nofoaga o le a tapuvae tasi iai le fonotaga, ma ua faamalieina lea asiasiga i le tulaga o loo iai le nofoaga ma lo tatou malaevaalele.
Peitai o loo faagasolo tapenaga i le itu i le puipuia o le saogalemu o usugafono ma taitai o atunuu e 56 o le lalolagi o le a malaga mai mo lea faatasiga tele a taitai o Malo o le Taupulega.
