Na ave e leoleo alii e toalua na faatupu vevesi ananafi i le mall tele a le Sylvia Park, ma na ta’ua e leoleo o ni alii e iai o la sootaga ma le kegi a le Rebels.
Na faate’ia le toatele na iai i le Sylvia Park i le aoauli i le misa ai o i laua nei ma e feta’ua’ina mai o lea na umia agaese ma nisi o meatotino e tusa ma lipoti a leoleo.
Ona o auupega na umia e alii nei, o lea na tali atu ai leoleo ma na faaaupegaina foi.
Na ta’ua mai ai i molimau e na o nai minute na lipotia ai ae tutū atu leoleo, ma o lea na maua atu e leoleo le toalua lea ma na saisai mai e tālia ai le molia i moliaga o le faatupu vevesi i nofoaga faitele.
E tuufaatasia tala fou o loo faaauau suesuega a leoleo e saili le isi toalua e faapea o lea foi na aafia i le vevesi lenei.
O le tulaga e faafetaia ai e lei iai se isi na afaina ai, aemaise o lea na tupu e lata ane i le nofoaga o loo iai fale’aiga ma taumamafa ai tagata faatau.
