Ua aveina atu nei i le falepuipui i Silverwater i Sini lē ua faamaonia moliaga o le fasioti tagata o Chris Dawson ina ua mae’a lauina le i’uga a le faamasino i le mataupu na aafia ai.

O Dawson 74 tausaga sa tuua’ia i le maliu o lona to’alua i le 40 tausaga talu ai i le 1982 ma o se mataupu sa gugulu ai le atunuu ona e oo mai i le asō e le’i maua lava le tinomaliu o Lynette Dawson. 

E tele su’esu’ega ma famasinoga na faia i le mataupu lenei ae o le vaiaso nei faato’ā faia i ai se faai’uga a le faamasino sa feagai ma le mataupu ma ua faamaonia ai moliaga o le fasioti tagata o lea alii faia’oga. 

O lipoti mai le Alaata7 a Ausetalia ua ta’ua ai le maua o le faamaoniga ua taunuu Dawson i le falepuipui i Silverwater e ui o loo iai lipoti e toe apili e lana loia le faai’uga na faamatuu mai i le Aso Lua.

O loo ta’ua foi o Dawson o se tasi o fetu pupula na iai o le taaloga lakapi liki a o talavou ma o se alii faia’oga ua litaea.