O le vaa folau o le Gaualofa o loo taula i le aloalo o le gataifale o le penisula i Mulinuu o se vaa o fausaga anamua lea o loo iai le mau sa faaaogā e tagata Polenisia e aofia ai Samoa e folau ai i le vasaloloa, auā o le mau lea o talafaasolopito o Samoa isi tagata folau o atunuu Polenisia.
O le taula ai i lea ogasami o le taulaga o Apia o le Gaualofa ua faailoa ai e le faalapotopotoga o le aiga folau o Samoa, o le Aso Toona’i nei e tatala ai le avanoa e maimoaina ai e tupulaga talavou lea ituaiga o fausaga o vaa folau anamua.
O se avanoa lelei e pei ona faailoa e le aiga folau o le a maua ai le silafia ma le iloa o fanau talavou i fausaga o ia ituaiga o vaa.
O le masina ua mavae sa talimalo ai lea aiga folau o Samoa i le malaga mai o se vaa folau o tagata Maori o Niu Sila lea sa afea ai le gataifale o le afio’aga o Poutasi i Falealili.
O se a’oa’oga i le sa’ilia o le tomai o kapeteni i le faaaogāina o le si’osi’omaga faalenatura e pei o le la, fetu ma le masina i le po e tapasā ai le vaa folau na malaga mai ai i Samoa.
O le faamoemoe i le Aso Toona’i o lenei vaiaso o le a tatala foi i le lautele o le atunuu e fia maimoaina le Gaualofa.
