O le minisita o le Home Affairs a Ausetalia o Tony Burke o loo mautū pea lana finau o loo faatino e le malo laasaga e tetee atu ai i faiga lē alofa ma uiga lẽ manuia e faia faasaga i tagata Isaraelu i le atunuu.
I le mae’a o le faalavelave i le amataga o lenei vaiaso i Bondi na faia ai se faamatalaga mai le Special Envoy to Combat Antisemitism, Jillian Segal e faapea e tatau i le malo ona faia nisi gaioiga e malosi atu e tetee atu ai i nei tulaga ma e lē o lava le a’oa’oga ma le fe’au e faailoa atu ai lea matāupu ina ia malamalama iai tagata ma ona aafiaga i komiuniti.
Ua teena e le minisita o Burke nei faamatalaga ma ia ta’ua ai na te teena faamatalaga o loo ta’ua ai ua faatuai le malo i le faatinoina o lapata’iga i tulaga faapea, aemaise faamatalaga e faapea e le’i faatinoina se faiga i lapata’iga na faia ane e Segal ia Iulai e faatatau i matāupu faapea.
E to’atele ua faaleo faitioga i luga o upega tafa’ilagi e faatatau i le matāupu lea ma upuia ai le malo o Ausetalia e lē o lava a latou gaioiga ma tulafono fai e faatatau i le taofia ma le faamuta o ia ituaiga uiga e faia i totonu o le atunuu e lē gata i tagata Isaraelu ae o soo se tagata lava.
E ui i le tele o faitioga ae na faatino lava e le minisita le faaoo atu o lana pale i Bondi i le nofoaga na tupu ai le faalavelave i le po anapo ma faailoa ai lona faaaloalo ma alofa’aga mo aiga o i latou na aafia i lea faalavelave.
Puna o Faamatalaga: https://www.9news.com.au/national/bondi-beach-shooting-tony-burke-defends-australian-governments-actions-against-antisemitism/73c5b545-ea99-4751-ad90-350253fdf2a9
