Ua molia e leoleo se tinā i le taupulepule e fasioti lana fanau e to’atolu lea na maua atu o iai manu’aga i se fale i le itu i Matu i Sisifo o Sini i le vaveao ananafi.
Fai mai lipoti na taunuu atu le fesoasoani faavavave i le fale o le aiga lea ma maua iai tamaiti e 10 tausaga le isi, 13 le isi ma le isi e 16 tausaga atoa ai ma se tamaitai e 47 tausaga le matua o tau fai manunu’a uma.
O le 47 tausaga lea e pei ona faailoa e talitonu leoleo o le tinā o tamaiti ma sa faia iai togafitiga ia i latou uma ia a o le’i aveina atu i le falema’i.
E le’i leva ae faailoa loa e leoleo ua molia le tinā ma e lē o mafai ona tatala i tua ae tula’i i le asō i le faamasinoga i Paramatta.
O faamatalaga a tuaoina ta’ua ai le faate’ia o i latou i lenei faalavelave ae o se aiga e lē faalogoina se pisa ane ma e filemu lava.
Ua faailoa foi e leoleo e leai ni faamaumauga o ni sauāga i aiga na aafia ai se tasi mai le aiga lea ma ua ta’ua i isi lipoti o le tamā o le aiga na aveesea mai le a’upega o le naifi sa i le tinā lea e feta’ua’ina na faaaogā e faaoo ai manu’aga i nai tamaiti.
Fai mai leoleo o loo faia le su’esu’ega ae e foliga na iai se tulaga faalemafaufau na aafia ai le tinā na afua ai ona ia faatino ia gaioiga.
Puna o Faamatalaga: https://www.9news.com.au/national/three-children-woman-stabbed-north-west-sydney/d4538b25-1f23-488f-b154-870bb1c6e6b4
