O Naveed Akram le alii lea ua molia nei i moliaga e 59 e faatatau i le faalavelave na tula’i mai i Bondi i le amataga o le vaiaso, ua faailoa i lipoti ua faasolo manuia i le falema’i lea sa taofia ina ua koma i le mae’a o le faalavelave.
E 24 tausaga le matua o Naveed ma ua faamaonia mai le faia o ona moliaga e le NSW Joint Counter Terrorism Team lea e aofia ai leoleo a Niu Sa Uelese, AFP, ASIO ma le NSW Crime Commission.
E aofia ai i moliaga, moliaga e 15 o le fasioti tagata, faataunuu o se gaioiga faatupu faalavelave, 40 moliaga o le faaoolima ma le faamoemoe e fasioti atoa ma isi.
Fai mai sa tula’i i le faamasinoga e faaaogā ai se fesoota’iga i luga o upega tafa’ilagi mai le falema’i o loo taofia ai.
Ua faailoa mai e lē o malosi lelei e ave ai i le falepuipui ae o loo taofia pea i le falema’i i lalo o le vaaiga a leoleo.
O loo musu e talanoa ma leoleo ae ua faailoa foi e leoleo e mana’omia ona o latou faamautū o loo malamalama lelei le alii lea i le mea o loo tupu.
Ua faailoa e le 9News e fai si tele o loia sa afea pe fia tula’i e fai ma sui o Naveed i le faamasinoga peita’i na o latou teena uma.
O loo feta’ua’ina foi o le vaega faatupu faalavelave a le ISIS lea e foliga na faaosofia mai ai lenei osofa’iga.
Puna o Faamatalaga: https://www.9news.com.au/national/bondi-shooting-accused-gunman-naveed-akram-charged/a896ad6f-518f-4c51-9fd9-d22d6f3b598e
