Ua faamautuina lava e Niu Sila lona tulaga i le pito i luga o le faasologa o ‘au o le lalolagi i le faagatama o le lakapi taitoafitu e le gata i le itupa o alii ae faapea foi i tamaitai.

Ua mautinoa nei foi le manumalo o le itupa o alii i le vae o le taamilosaga a le HSBC World Rugby Sevens i Toulouse i Farani sa faagasolo mai le faaiuga o le vaiaso talu ai.

Na saunoa le kapeteni o le ‘au a alii, Sam Dickson e lagona le mitamita i lana ‘au aemaise o le finau i le finals i le taaloa ma Argentina na toe malo ai lava i le taimi faaopoopo i le sikoa a le alii o Roderick Solo ma faaiu ai le taaloga i ai e 24-19.

O Falani na malo i le pine apamemea ma Ausetaliai le tulaga 5, e lei faamanuiaina le taumafai a Samoa i le tulaga 9.

I le itupa o tamaitai o loo sili ai foi Niu SIla lea ua malo i le taamilosaga o lenei tausaga ina ua toe sola mai foi ma le Ipu o le vae lea o le taamilosaga i Toulouse.

Malo ia Amerika i le finals i ‘ai e 19-14, o le pine apamemea na maua e Ausetalia lea na faia’ina ai Falani.

Ua mae’a ai le taamilosaga mo tamaitai i le vae lea sei vagana alii toe tasi le vae o le taamilosaga e faia i Lonetona i le aso 20-21 o le masina nei o Me.