E silia i le tasi le miliona 452 afe tala le tau o galuega o auala tetele ua mae’a faavalitā ma fausia ai ma alavai i le motu i Savaii lea na tatala e le Minisita o Galuega tetele i le Aso Tofi o lenei vaiaso.
O le auala fou i Fogasavaii e silia i le 442 afe le tau na fausia e le konekarate fauauala o le Handyman, o le auala i le afioaga o Taga e 443 afe 335 tala le tau na fausia e le konekarate o le Apia Lua ma o le auala e agai i le mataaga o loo iai le pupū poo le Taga Blow Holes.
O le auala i Vailoa Palauli e 567, afe ma le 36 tala le tau na fausia foi e le konekarate fau auala o le Apia Lua.
O galuega faaauau ia a le Malo o loo faatino e le gata i le motu i Savaii ae faapea foi i le motu o Upolu ma o ni galuega e talosagaina pea e sui faipule pe a oo ina sausaunoa i fono a le Palemene i le taimi e soalaupule ai tala o le tupe.
