O le tau amataga o le tausaga nei na afea ai le nofoaga o loo faamautu ai fanau ua sauaina e se aumalaga o alii ma tamaitai leoleo Niu Sila, o le latou malaga lea na faia ai le latou fuafuaga e malaga mai ni o latou sui e auai i le faasavaliina o le sulu o le filemu.
O le leoleo satini o Siki Ah Shew ma nisi o leoleo mai Aotearoa na auai i le faasavaliina o le sulu i le vaiaso muamua ma sa latou foai ai ma se latou meaalofa tupe e limaafe tala.
O lea seleni na latou tuufaatasia i se suegatupe na faia i le nofoaga o loo galulue ai leoleo i Aukilani i Saute.
O le faaiuga o le vaiaso na tea nei na taunuu ai nisi sui o leoleo mai Niu Sila i le fia lagolago lava i le faasavaliina o le sulu o le filemu, o loo momoliatu ai le feau e taofia sauaga o loo aafia ai tina ma tamaitai, o fanau teine a le atunuu.
