O le usugafono a lo tatou malo i le vaiaso nei faapea le vaiaso fou i le fono o le COP-29, o loo autū talanoaga i fuafuaga ma polokalame mo le faasaoina o le tatou lalolagi.
Ua lagolago atu ai Samoa i le mau o loo momoli faatasi e atunuu laiti o le Pasefika ina ia faatumau fuainumela e faaitiitia ai kasa kaponi e pua’ina atu i le osone o le lalolagi i le 1 tesimale 5 tikeri Celsius.
O lea fono o loo usuia i le aai o Baku i le atunuu o Azerbaijan ma o loo auai ma usugafono mai atunuu tetele ma malolosi o latou tamaoaiga.
O atunuu ia o loo pito sili ona tele kasa kaponi mai o latou falegaosioloa o loo pua’ina atu i fafo ma afaina ai le osone lea o loo iai mau a le ‘ausaienitisi, o le mafuaaga ogaoga lea o loo faatupula’ia ai le vevela o le lalolagi ma mafua ai suiga o le tau.
O le mau a le Pasefika o loo taulamua ai le Palemia o le atunuu o Tonga o loo umia le tofi ta’ita’ifono o le fono a Malo o le Pasefika.
