Search
Court

Auai le Fofoga Fetalai i le suesueina o le talosaga a Toomata Norah

O le suesueina o le talosaga a le Afioga Toomata Norah Leota faasaga i le Komesina o faigapalota e pei ona fesiligia ai le filifilia o sui tauva tamaitai e toalua e atoa ai le ono o nofoa o tamaitai i le Palemene, ua iai ma le itu a le Fofoga Fetalai o loo tulai ai le tamaitai loia tutoatasi le faletua o Leilani Tamati.

Sa talosaga le loia e avea ai ma sui o le Fofoga Fetalai e fia auai o se itu e molimauina ma mataitu taualumaga o suesuega ma o loo talia e isi itu auai, ae o loo teena e le loia o loo finauina mau a sui tamaitai e toalua na filifilia e le Komesina o faigapalota i aiaiga o le tulafono o faigapalota faasino i le 10 pasene o nofoa o tamaitai i le palemene o Samoa.

Ua iai le finagalo o afioga i alii faamasino e toatolu o loo tagofia le talosaga e aofia ai le faamasino sili, e auai le loia mo le Fofoga Fetalai i suesuega ae o le a aumai se faaiuga i le talosaga pe a fofogaina se iuga o le mataupu autū na faaulu e Toomata Norah Leota.

O loo ogatotonugalemu i le finauga a le itu talosaga le mau o Toomata, e tele atu ana palota na manumalo ai ma maua le tulaga lua i le filifiliga a le itumalo faapalota o Anoamaa i Sisifo, faatusa i le numera o palota na maua e Aliimalemanu Alofa Tuu’au na tauva mo le nofoa o Alataua i Sisifo.

O le isi vaega tāua o le mataupu lenei pe o le ā le faamatalaina o le tulafono o le 10 pasene, pe e fua i le aofai o palota mo sui tauva tamaitai i itumalo na tauva ai, pe e fua le 10 pasene i le aofaiga o palota na maua e sui tauva tamaitai uma sa tausinio i nofoa e 51 o le Palemene.

O loo atagia foi i le finauga a le loia o loo tauaveina le mau a le itu talosaga, e ono mafai ona faapea e faailoga tagata lea aiaiga o le tulafono o faigapalota. O mau faaletulafono uma ua folasia e le itu talosaga ma loia a itu auai aemaise itu o loo faasaga i ai le mataupu, ua i luma nei o le faamasinoga mo se iloiloga ma faia i ai se faaiuga.

E pei ona silafia o Aliimalemanu Alofa Tuu’au na filifilia e atoa i ai le ono nofoa o tamaitai ina ua mae’a le palota tele, ae na ave lea faaiuga a le komesina o faigapalota i le faamasinoga ma toe faasolomuli ai i tua i se faaiuga.

Na finauina foi i le faamasinoga pe lima pe ono nofoa o tamaitai e fua i le 10 pasene o le 51 nofoa o le palemene i le finauga e tatau ona lima lea na talia e le faamasinoga sili i lana faaiuga. Na toe apili le faaiuga lea ma aumai ai ua ono nofoa o tamaitai ae lē lima.

O lea la ua ono nofoa i aiaiga o le 10 pasene ae ua fesiligia le auala na faavasega ai e le komesina o faigapalota le sefulu pasene e fua i sui tauva tamaitai na tauva i le palota tele ia Aperila ma tamaitai na tauva i palota laiti na faia ia Novema o le tausaga ua mavae.

Tala sili ona faitaulia

TALA FOU MAI SAMOA

SAMOA UPDATE

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required