O se tala ‘ave i tagata Niu Sila a o Samoa le auai ai o nisi o sui o le ‘au aiga o Leung-Wai, o sui o lenei itulagi o loo i Roma e faamavae atu i le Tamā Paia o le Pope Falanisisi.
I lipoti mai le 1News na faailoa ai e le tamaitai o Fatima Leung-Wai, le tāua tele o lenei faamoemoe, ma lo latou auai ai i Roma, ma o se vaega o le a o latou manatua pea.
Ua faamauina na alafa’i uma i latou e auai i sauniga e faamavae atu ai i le ta’ita’i o le Ekalesia.
Ma na ta’ua le tapenapena mae’ae’a o Fatima ma lona tuagane faapea lona uso mo faamoemoega uma, e pei ona iai faguvai o meaai faapea ofu mafanafana mo nai o latou tua’ā, na faimalaga atu foi i Roma i Italia.
Ta’ua e le ‘auuso e le’i fuafuaina le auai i toe sauniga a Pope Falanisisi, sa faimalaga atu lava ona o nisi o faamoemoega ma le faamanatu ai o le Eseta, ma o sa latou faigameaalofa mo o latou mātua, ae peita’i ua tuumalo lava le Tamā Paia a o iai i le atunuu.
O Fatima ma ona tei sa mafai ona feiloa’i atu ia Pope Falanisisi i le 9 tausaga talu ai i se faatasiga tele ua ta’ua o le Catholic World Youth Day i Polani, ma sa mafai ona faitausama’aga faatasi le tamaitai o Fatima ma Pope Falanisisi.
E ui o se taimi faanoanoa, ae na ta’ua e i latou nei le tāua ma le matagofie o le maua ai o le avanoa e auai atu e sa’afi se tamā sa telē lona sao i le ola o tagata Kerisiano i le lalolagi, aemaise le faatuatuaga Katoliko.
Puna o Faamatalaga: https://www.1news.co.nz/2025/04/26/kiwi-family-among-last-to-pay-respects-to-late-pope-francis/
