Ua sau le faatonuga e aua le tufaina atu i tagata meaai na maua mai supamaketi na aafia i lologa.
O le faatonuga lea mai le matagaluega o primary industries agai i le Kiwi Harvest lea na ia aumaia le tusa ma le 8 tone o meaai ua uma ona faapusa faapea meaai tuuapa.
A o faaaoga ai e le Kiwi Harvest meaai nei mai se tasi o supamaketi na lolovaia i lologa faatoa uma atu i Aukilani, e le o manao ai le matagaluega ona o le popolega o le saogalemu o nei oloa.
O se manatu mai le matagaluega o vai mai lologa na ono omai faatasi pe fefiloi ma otaota poo vai leaga mai faletaele, o vailaau, meaola mamate ma isi lava siama e ono aafia ai.
Ae i se tali a le pule sili o le Kiwi Harvest, o le taiala lava na sau a’i o le tufa o meaai nei ma o se faiga ua faitau tausaga o fai, peitai e mulimulitaia lava foi le faamuamua o le saogalemu.
Ua uma ona fai tala a le matagaluega ma le Kiwi Harvest ma o lea foi ua galulue faatasi mo le mautinoa e saogalemu meaai o loo tufaina atu i aiga.
E ese mai i faalapotopotoga nei e tufaina meaai mo le komiuniti, o supamaketi le isi vaega o loo galulue ma le matagaluega ina ia mautinoa o loo saogalemu meaai o loo o latou foaia.
