Ua amata le masina o Me i le faailoa mai e le vaega o matapu tau femalagaiga a le Malo o Niu Sila o le toe tatala o lana polokalame nofomau mo tagatanuu o Samoa ma isi motu o le Pasefika i le aso 20 o lenei masina lona 5 o le tausaga.

O tagata o le a manuia talosaga o le a maua le nofomau i Niu Sila e pei ona faatulaga mai e 1,650 mo Samoa, 250 mo Tonga, 250 foi mo Fiti ae tai 75 avanoa nofomau mo atunuu o Kilipati ma Tuvalu.

E amata tuuina atu talosaga i le aso 20 o Me ae tapunia talosaga nofomau uma i le aso 30 o le masina fou o Iuni. 

I le mataupu i le mau o le sitiseni Samoa e pei ona faamaopoopoina e nisi o tamalii o le atunuu i Niu Sila e aofia ai nisi sa avea ma Faipule o le Palemene o Aotearoa, o lea ua faailoa i se pepa o faamatalaga faalauaitele le amata faia o tala’iga e ala i faasalalauga, ua ave ai le avanoa i soo se tagata Samoa o aumau ma alala i fafo aemaise foi o le atunuu i Samoa, ina ia tuuina atu ni latou folasaga poo submissions, e lagolagoina ai le tulafono taufaaofi poo le pili na faatuina e se faipule o Niu Sila o se tagatanuu o le Atu Kuki, lea ua toe finauina ai le toe faaaogā o le tulafono o le sitiseni o tagata Samoa sa fananau ma soifua mai i le masina o Me o le tausaga 1924 agai atu i le aso muamua o Ianuari o le tausaga 1949.

O le tulafono taufaaofi ua finauina ai le toe Faafoisia o le Sitiseni na aveeseina i lalo o le Tulafono Sitiseni (Samoa i Sisifo) 1982, a Niu Sila.

Ua mae’a ona pasia i le faitauga muamua ae o loo tapena folasaga e tuuina atu i se komiti faapalemene a Niu Sila a o lei oo i le faitauga faalua o lea pili poo le tulafono taufaaofi.