Ua i luma nei o le faamasinoga sili a le atunuu le talosaga a sui faipule tamaitai e to’alua o le vaega e puipuia aiātatau a tagata le afioga Aliimalemanu Alofa Tuu’au ma Faagasealii Sapoa Feagia’i, ua la lu’i ai le faai’uga a le faamasinoga na filifilia ai le afioga Toomata Norah Leota o se tasi o faipule mo nofoa faaopoopo o tamaitai, o se sui faipule o le vaega faaupufai o le Faatuatua i le Atua Samoa ua Tasi.
O le lua masina ua mavae na fofogaina ai le faai’uga a le Faamasinoga Sili na faatonuina ai le Fofoga Fetalai o le Palemene e faatauto tamaitai e to’atolu e pei ona faailoa atu suafa e avea ma sui faaopoopo o nofoa o tina ma tamaitai i lalo o aiaiga o le Vaega 441A o le Tulafono o Faigapalota, ina ua mae’a su’esu’eina se lu’i faaletulafono a Aliimalemanu Alofa ma Faagasealii Sapoa e faasaga i le faai’uga a le Fofoga Fetalai na lē faatautoina ai ia sui faipule tamaitai faapea le lu’i a le afioga Toomata Norah Leota faasaga i le Komesina o Faigapalota sa finauina ai e lē sa’o le auala na saili ai le sefulu pasene e maua ai nofoa faaopoopo e atoa ai le to’aono o tamaitai i le paeaiga lona 17 a le Palemene.
O le apili ua tuuina atu ua faapena ona toe tolopo i le aso 8 o le masina fou o Aokuso, e tuuina atu ai le tali a Toomata Norah Leota e ala i lana loia i le talosaga a le itu tagi. Faaalia e le tamaitai loia o loo tauaveina le apili, o loo faavae lana finauga i le lē sa’o o le faai’uga na tofia ai Toomata ma e sese foi le auala poo le calculation a le faamasinoga na faamatala ai le aiaiga 441A faasino i le 10 pasene. O le afioga Toomata Norah Leota o se tasi o Minisita Lagolago o le faigamalo a le Faatuatua i le Atua Samoa ua Tasi.
