Ua aofia nei Samoa ma le atunuu o Kilipati i le polokalame a le malo o Ausetalia e talosaga ai mo Visa e mafai ona ulufale ai i lea atunuu ma nofo ai, faigaluega ai, pe auai ai foi i ni a’oa’oga.
Ua faaigoaina lea polokalame o le Pacific Engagement Visa, ma o le Aso Gafua o le vaiaso nei 28 o Iulai na faailoa ai e le Minisita o le Va i Fafo o Ausetalia, ia Penny Wong le tatala o le avanoa lona lua i lalo o lea polokalame tau femalagaa’iga a lona malo talu ona amata i le tausaga na te’a nei, ma ua aofia ai ma Samoa ma Kilipati.
E sefulu isi atunuu o le Pasefika e aofia ai ma le atunuu o Timor Leste na amataina le polokalame lea e tasi le afe tagata ua amata nei ona faamautū i Ausetalia ma galulue ma a’oa’oina ai.
E 3 afe talosaga mai atunuu e aofia ai Samoa, o Tonga, Fiti, Nauru, Palau, Papua Niu Kini, Solomona, Kilipati, Vanuatu ma Timor Leste e avanoa ona tuuina atu i le polokalame, ma faia iai le iloiloga e iloa ai talosaga e faamanuiaina.
E 56 afe tagata sa aofia i talosaga muamua na tatala ai lea polokalame a le malo o Ausetalia.
