Ua faaiu i le aso ananafi le aoaoga mo faipule o le Vaega Faaupufai o le Faatuatua i le Atua Samoa ua Tasi.
O le auga e pei ona ta’ua e le Failautusi o le vaega faaupufai ia Vaaaoao Alofipo, ia iai le malamalamaga o le sui faipule i le tulaga tau polokiki, ma le faatemokalasi.
E lua aso sa faatautaia ai lea aoaoga ma o se polofesa mai Siamani o se Konesale o loo ua mautu lo latou ofisa i Ausetalia le kamupani o le Konrad Adenauer, na talosaga mai mo aoaoga e pei ona latou faatino ai lea tulaga i nisi o atunuu o le lalolagi.
Na faailoa e Vaaaoao o le lona lua ai lea o aoaoga faapea mo faipule, ma o loo iai le avanoa e aoaoina ai sui faipule o isi vaega faaupufai pe a talosagaina le auaunaga a lea kamupani.
Ae na faaalia e le Tamaitai Palemia, Afioga Fiame Naomi Mata’afa i lana vaai faaletaitai iai, e aogā lea aoaoga e faatupu ai mafaufauga o sui faipule fou i itu tau pati, o ā ituaiga pati, auā o le pati ua lē ese ma se taavale afi.
O nisi o mataupu sa ia ta’ua e aofia ai le oia o faavae faatemokalasi lea sa aliali mai i lo tatou atunuu i le mae’a ai o faigapalota.
Faailoa e Fiame o loo a’oa’o mai le tulaga o le faiga faatemokalasi lelei o i latou e tamau ma mulimulitaia mea moni ma faavae.
E lē gata i lea o le aoaoga i tulaga o loo faaaogā ai e tagata le pule ma le malosiaga atoa ai ma le tulimataia e pei o atunuu i Europa e sese loa ona faaaogā e faasala ma aveesea.
Saunoa le Tamaitai Palemia o le tele o tagata ua lē iloa lo latou tulaga ma ua lē fia faia faatonuga e tusa ai ma o latou tiute fai.
