Ua faailoa manino e Donald Trump, le Peresetene o Amerika o le a ia tuuina le 15 pasene o totogi faaopoopo poo tariffs i luga o oloa auina atu mai Korea i Saute atoa ma sana faamatalaga o le atoaga lea o le maliega tau fefaataua’iga sa faia.
Ua faia lea folasaga ae toe tasi le aso faagata nisi o maliega ma Amerika, a leai o le a feagai ma nisi totogi faaopoopo e maualuluga atu.
O le 15 pasene la lea o tariffs e pei ona folasia e aofia ai ma taavale o nisi ia o oloa autū e auina ane mai Korea i Saute i Amerika.
Faailoa e le CNN o loo fiafia le ta’ita’i o le atunuu o Korea i le fetuuna’iga ua iai ona fai mai a ia o le a tuu ai loa lona atunuu i se tulaga tutusa pe sili teisi foi i isi atunuu.
O loo ia Korea le malosi e faatonutonu ai le aofa’i o le alaisa mai Amerika aemaise o le ituaiga aano o manu papalagi e mafai ona aveina ane ia i latou.
Ua ta’ua foi i le lipoti ua folafola e Korea i Saute le inivesi i Amerika o se vaegatupe pe $350 piliona ma o le a fesoasoani lea i le fausia o vaa Amerika e aofia ai ma vaalele tau.
Puna o Faamatalaga: https://www.bbc.com/news/articles/czxpvl9krxwo
