Ua folafola mai e le Failautusi o le malo tele o Amerika o Marco Rubio ua faalēaogāina nei e Amerika visa uma sa tuuina atu i tagata e umia tusifolau mai Sudan i Saute ona o le mumusu o lea atunuu o Aferika e talia ona sitiseni ua aveesea atu e Amerika.

I se pepa o faamatalaga mai le alii failautusi ua ta’ua ai o le a poloka foi e Amerika nisi tagata mai le itu i Saute lea o Sudan mai le toe ulufale i Amerika.

Ua tuua’ia ai e Amerika le faai’uga a le faigamalo a Sudan i Saute i le mataupu lea.

Fai mai Rubio i lea pepa o faamatalaga o atunuu uma e tatau ona talia le toe faafoi atu o ona sitiseni pe afai ua aveesea atu mai Amerika poo se isi foi atunuu.

O South Sudan o se atunuu na maua lona tuto’atasi i le 2011 ina ua aga’i ese mai Sudan peitai e lua tausaga mulimuli ane ae alia’e ai loa feeseesea’iga i le va o le Peresetene ma le Sui Peresetene ma i’u ina tula’i ai ma vevesi i totonu lava o le atunuu ma ua silia ma le 400 afe tagata ua fasiotia ai.

Puna o Faamatalaga: https://www.bbc.com/news/articles/cn5x775plnlo