O loo molimauina pea le aafia ai o North Island i timuga mamafa, ma o loo iai pea faamatalaga ma fautuaga mai vaaitau i le faateteleina ai o uiga loulouā o le tau, i le aga’i mai o peau māmā o le ‘ea faasolo mai i Saute mo Niu Sila.
Faamanino mai le fetaia’i pea o Northland ma timuga mamafa, ma ona o le tele o nei aafiaga e pei foi ona pagātia ai i lōlōga tetele, o lea ua aga’i ai Northland e faatulaga se poloa’iga o faalavelave tutupu faafuase’i mo le itumalo o Whangārei.
Ua fautuaina malosi ai e sui o le Vaega o Puipuiga Faalotoifale – le New Zealand Civil Defence tagata o lea itumalo ina ia tapenapena ma sauniuni mo timuga tetele e ono oo mai i le Aso Tofi.
O loo valoia e le Ofisa o le Vaaitau e oo atu i le masina le aofa’iga o suavai timu o le a pa’ūū i totonu o le na o le 2 i le 3 aso.
Ta’ua i lipoti o loo iai pea fautuaga i le vaega lanu moli mo lea faaitu le Coromandel Peninsula, Bay of Plenty, o loo aofia ai ma Rotorua, Gisborne i Mātū o North Tokomaru Bay.
Faaalia e ono oo atu i le taeao o le Aso Tofi ua 200 ma 250 milimita o le suavai timu ua pa’ū mo Coromandel Peninsula lava ia; ae ono faatupula’ia tulaga loulouā ma suia ai le iai o ia faaitu mai le lanu moli aga’i i le lanu mūmū.
O lea ua faasolo ona faalauiloa mai fautuaga ma lapata’iga o timuga mamafa i Aukilani ma nisi o faaitu o le atunuu, ma ua lapata’ia e le kamupani o le Vector le ono motusia ai o le eletise talu ai le malolosi o savili.
Ua fautuaina nai aiga o loo nonofo i nofoaga tū lalata i le sami ina ia tapenapena i tulaga o mea e moomia ma ia faatulaga se fuafuaga mo le taimi e tula’i a se faalavelave.
Puna o Faamatalaga: https://www.nzherald.co.nz/nz/weather-heavy-rain-severe-gales-lash-auckland-northland-coromandel-bay-of-plenty/BW2EQNSRRVBCHK4VSCO5RTZY6Y/
