O le Aso Lulu o lenei vaiaso ua amata tatala ai le galuega o le resitalaina o tagata e agavaa mo le faigapalota tele a le atunuu i le tausaga fou 2026, mai le 9 i le taeao e oo i le 8 i le po.
O le Aso Toonai o le vaiaso nei foi e amata tatala ai lea galuega i le ofisa autu lava i Mulinuu mai le 9 i le taeao e oo i le 4 ile afiafi. Ua faailoa e le Ofisa o le Komisi o Faigapalota ia suiga o itula o lana auaunaga i le auala o ana fesootaiga ile upega tafailagi, ma le faanaunautaiga ia faaaoga lea avanoa e nuu ma afioaga tau lalata ile ofisa autu ma le atunuu lautele.
Ua faamanatu ai pea e le ofisa i tagata e fia lesitala e tatau ona tauaao atu pepa mo le faamaoniga o se tagata e pei o le laisene ave taavale o loo iai le ata. Pepa ID o le NPF, pepa ID o le penisione, ma se tusifolau.
E tatau foi ona tauaao atu le pepa e faamaonia ai le nuu o loo faamautu ma nofo ai, e pei o le pepa o le pili o le vai, pili o le eletise, pepa o le fanua, poo le pepa tui o le faamai koviti.
E manaomia foi le pepa faamaonia ua resitala faaletulafono se suafa matai pe afai e fia faaaoga le suafa matai e resitala ai mo le palota.
O loo faaauau lea galuega ao tālia ai teuteuga fou o le tulafono o faigapalota o loo taoto nei i le Palemene, ma o se tasi o ia teuteuga o le tatala lea o le avanoa e palota mai ai i atunuu i fafo o tatou tagata o loo tautua aitau malele mai ai.
