Ua amatamea le asosi o alii ma tamaitai sa aooga i le kolisi o Avele ua aumau ma alaala nei i le aai o Sini i le setete o Niu Sa Uelese i Ausetalia, i le faama’ite o fuafuaga e fesoasoani ai i le faailogaina o le atoaga o le 100 tausaga o le kolisi e pa’ū tonu i le masina o Iuni o le tausaga fou 2024.

O le toe fausia o le maota Samoa o le kolisi ua muamua palasi iai le asosi i Sini Ausetalia i le latou foai e 30 afe tala, lea o le a amata ai le galuega i le masina nei o Iulai, ma le faamoemoe e taunuu mai foai ma meaalofa a isi vaega o le asosi o tama ma teine tuai o Avele o alala i isi atunuu i fafo, ma faaauau ai lava le galuega o le maota samoa.

O le susuga i le peresetene o le asosi o tama ma teine tuai o Avele i Sini Ausetalia sa ia faailoa ia fuafuaga uma.

Ua faaalia foi e le afioga Afamasaga Taulapapa Leiataua Faleata Iosefa, o le peresetene o le asosi o tama ma teine tuai o Avele i Sini Ausetalia, o le tasi o fuafuaga a le asosi tele o le a togi maa uma iai mo le selau tausaga o le kolisi, o le leitifoni e faia i le faaiuga o le masina o Setema o le tausaga nei, o le a auai sui uma o le ACOPA poo le asosi o tama ma teine tuai sa aoaoina i le kolisi o Avele.

Le Peresetene o le asosi a avele tuai i Sini Ausetalia afioga Afamasaga Taulapapa Leiataua Faleata Iosefa.

O le faaiuga o le vaiaso nei i le Aso Faraile e faia ai le tauvaga o tausala ma manaia o loo tapena foi e nisi o sui o lea asosi, mo se isi sailiga seleni mo le fausia o se faletusi ma isi galuega mo le faaleleia o le lotoifale o loo aoaoina ai fanau a le kolisi.

O se tasi lea o polokalame o le tapena atu ai i le faailogaina o le 100 tausaga talu ona faavaeina le kolisi o Avele ose tasi o kolisi maualuga a le Malo.