O le nofoaga tutotonu o galuega taulima ma suesuega o tomai tau aganuu le Tiapapata Arts Center, ua faagasolo ai i le vaiaso nei se a’oa’oga faapea ni sailiiliga i meafaigaluega sa faaaogā e Samoa anamua e faasino lea i to’imaa e fafau i le ‘afa.
O se polofesa mai le Iunivesite o New England i Amidale i Ausetalia e iai ona tomai ma agavaa a’oa’oina i mataupu tau i suesuega o tala faasolopito faatasi ai ma nisi o le auaooga i lea tomai mai lea lava Iunivesite o le a latou faatautaia ia a’oa’oga ma suesuega.
Ua faailoa e le pulega o le Tiapapata Arts Center, o le mae’a o se asiasiga a le alii pule o le nofoaga le afioga Galumalemana Steve Percival i nisi o fale mataaga i Europa o loo faalauiloa ai nisi o measina a Samoa e aofia ai ma to’imaa, na tapena ai loa le faamoemoe ua amata faagasolo i le vaiaso nei.
O le toe suesueina o ia measina a le atunuu o se galuega ua mafai ona faatino i le fesoasoani a le Iuni a Europa, le faalapotopotoga o atunuu Aferika, Kerepeane ma le Pasefika, faapea le SPC ma le Iunivesite o tomai faatekonolosi i Brisbane i Ausetalia.
