Afai o loo e fuafua e te faimalaga i le masina fou poo le vaitau o le tuuaga o aoga, o le a iai se isi vaega o le a faaopoopo atu e tatau ona e faia ae e te lei agai i le vaalele.
Fai mai le lipoti a le One News i le asō ua faailoa mai e le kamupani vaalele a le atunuu le Ea Niu Sila e iai se survey poo se suesuega o loo aofia ai ma e talosaga ai pasese uma ia faaaoga le fua e fua ai le mamafa o le pasese faapea ma a latou uta.
Fai mai sui o le kamupani i lea lipoti e moni e foliga e le masani ai lenei faiga peitai e tāua foi le suesuega o loo faia ona e manaomia le mamafa o mea uma o loo i luga o le vaalele.
Fai mai o le suesuega e tai lima tausaga ma faia ma e manaomia le lē itiiti ifo i le 10 afe o pasese e auai ai ina ia maua ai sona numera e talafeagai ma le mamalu o le atunuu femalagaa’i.
O le faiga la o le a talosagaina le pasese e tulai i luga o le fua mo le mamafa ae faaaoga foi le isi fua lona lua mo le fuaina o ana uta.
O le mamafa o le a faamauina i se laptop ma e le mafai ona iloa atu e tagata le mamafa ma e le faamalosia, e tuu i le faitalia a le tagata pe fia auai pe leai foi.
