Ua amata ona mātū le vai to’a mai lologa i Otago ma Canterbury peitai e ono faitau aso o motu ese le nuu o Lake Ohau.
O lea ua amata galuega faamamā a le Waka Kotahi auā le toe faaaogā o auala mo femalaga’iga i lea vaega o le South Island, peitai e lē iloa se taimi e toe tatala ai auala fesoota’i ma Lake Ohau ona o le leaga tele.
O loo iai le faamoemoega o le Waitaki District Council ia oo atu i le faai’uga o le vaiaso ua toe faaleleia ma tatala, ma o loo fai alofa i tagata ua momotu ese atu e le vai ona e leai ni faleoloa i lea pitonuu.
Ua vaavaai ai foi ma le Emergency Management i se auala e faaoo ai faatau ma mea o loo moomia e tagata ua aafia aemaise lava meaai.
E oo mai i le taimi e tuufaatasia ai tala fou ua tele ina toe tatala auala agai i Omarama.
