Ua faailoa lautele ai nei e le pulega o le matāgaluega o faamasinoga ma le faafoeina o mataupu tau faamasinoga, le amata faamamalu ai i le Aso Gafua o le vaiaso nei le aso 7 lea o Aperila 2025, o le Tulafono o teuteuga o le Tulafono o Faamasinoga o Fanua ma Suafa o le tausaga e 2025 e pei ona mae’a pasia talu ai nei e le Palemene.
O le afioga i le Minisita o Faamasinoga le tofa Matamua Vasati Sili Pulufana sa ia filifilia le aso 7 o le masina nei e amata faamamalu ai le tulafono o teuteuga o le tulafono o fanua ma suafa 2025, ae o le tulafono o teuteuga o le faavae 2025 na pasia faatasi ma lea tulafono toe teuteu o loo iai le poloa’iga lē tumau a le Faamasinoga Maualuga e taofia lona faaaogāina se’i mae’a ona iloilo muamua le talosaga a le ta’ita’i ma le sui ta’ita’i o le Itu Agai o loo lu’i ai le lua vae tolu na pasia ai ia teuteuga o le faavae.
O loo fesiligia i lea finauga faaletulafono faavae le palota o le Fofoga Fetalai e sa’ili ai le lua vaetolu.
O le aso 30 o le masina nei e valaau ai lea mataupu tau faamasinoga.
O le ta’ita’i o le Malo i le Palemia na te filifilia le aso e amata faamamalu ai teuteuga o le Tulafono Faavae o le tausaga 2025.
