Ua amata faaaogā nei le auala o loo i le va o le falemeli ma le faletupe o le ANZ i Apia i se suiga fou.
O lea suiga ua ui tasi uma ai taavale i le ulufale mai le magaala o le Convent Street i le sau i totonu ma afe loa i le itu agavale i luma o le faletupe o le ANZ ma aga’i i le itu o iai le uati tele.
O lea faiga o le a lē toe afe ai taavale i le itu taumatau e pei ona sa iai muamua.
O lea foi suiga o le a lē toe afe ai ni taavale i le itu taumatau i le va o le falemeli ma le faletupe o le ANZ pe a aga’i mai i le itu i Sisifo o loo iai le uati tele.
O le Aso Toonai na te’a nei na aloa’ia ai le amatalia o lea suiga ina ua mae’a galuega sa faatino e le pulega o fela’ua’iga i luga o le laueleele.
