O aafiaga o le tatou atunuu mai puipuiga o le pipisi o le faama’i koviti i le tausaga e 2020 faasolo mai i le 2021 na lē faamanatuina ai ma faailoga e le augalulue i faasalalauga eseese ma tusitala le aso faavaomalo na poloaina e Malo Aufaatasi e faatāua ai le saolotoga o le galuega a tusitala ma le aufaasalalau.
O le tausaga nei faatoa faamanatu ai e le asosi o tusitala ma le augalulue i faasalalauga lea aso tāua ma avea ai le ta’ita’i o le Malo le afioga i le tamaitai Palemia ma malo faapitoa na te saunia le saunoaga autu o lea aso i le lalolagi ma Samoa.
Sa ia folasia se feau malosi i le tāua o le saolotoga o lea tautua ma tomai i le logologoina o tagata i mea moni e tutupu, aemaise o lona afea o lu’itau e feagai ma tusitala i le faatinoga o le latou galuega faapei o atunuu o loo sauaina ai nisi tusitala ma iu ai lo latou soifua.
O se avanoa i le auai o le ta’ita’i o le Malo i le sauniga sa tapenaina e le asosi o tusitala i le atunuu na talosagaina ai se avanoa e maua ai pea ni feiloaiga ma le Malo aemaise i le Palemia i fono masani ma tusitala poo press conference, ona ua savali i le fitu masina e lei toe maua lea avanoa.
I le tali mai a le tamaitai Palemia le Afioga Fiame Dr. Naomi Mataafa na ia talia ai le fanoga ma se tuualalo.
O le faailogaina o le aso e faatāua ai le saolotoga o galuega ma tomai faatusitala sa ta’ita’i i le sauniga lotu le susuga i le faifeau Siaosi Salesulu ma sa ia momoli mai ai foi se feau tāua mo ē o galulue i le galuega.
O le feau autu o lea aso faailoga na saunoa iai le ta’ita’i o le Malo le afioga i le Palemia.
Le tamaitai Palemia, Afioga Fiame Dr Naomi Mataafa i se vaega o lana saunoaga i le gagana Peretania i le aso faailoga o le saolotoga o galuega faatusitala ma faasalalau i le lalolagi e pei ona sa faailoga foi i lo tatou atunuu i le Aso Faraile ua mavae.
O Samoa o loo i le tulaga 19 i le faasologa o atunuu o loo faatāua ai le saolotoga o i latou o galulue i lea tomai, a o Niu Sila o loo i le tulaga 13.
