O le alii faipisinisi, afioga Faimalo Allan Stowers, faapea le tamaitai faiaoga, le afioga Toeolesulusulu Melegalenuu Ah Sam, o nisi o tamalii Samoa, ua amanaia foi e le faigamalo a Niu Sila, e faaee atu ia i laua le pine taualoa a le Tupu Tamaitai o Peretania, o le Faaao o atunuu uma o le Taupulega a Peretania e aofia ai ma Niu Sila, ona o a la tautua matapalapala o loo faatino i totonu o Niu Sila aemaise lava i totonu o le aai tele o Aukilani. O le pine taualoa le Member of the New Zealand Order of Merit (MNZM).
O le Governor General, Dame Cindy Kiro, na fai ma sui o le Tupu Tamaitai o Peretania, e na te tauaao atu nei pine taualoa i tamalii Samoa ua faaeaina ai.
Faimalo Allan Stowers (MNZM)
O le afioga Faimalo Allan Stowers, o se tamalii e masani i le soifua tautua, e pei ona ofo atu lana tautua e tauala i le Samoa Victim Support Group (SVSG). O ia na auai i le faavaeina o le lala o le SVSG i Aukilani, seia oo ina toe talatala atili atu ai i isi vaega laiti.
E taulamua foi Stowers i sailiga seleni mo le lagolagoina o le Carmelite Nuns of Samoa. Na ia amatamea i le polokalame a le Lilomaiava Development Project, o se polokalame e saili ai avanoa faigaluega mo tupulaga talavou mai Samoa, ae ua faamalieina ai foi manaoga o pisinisi i Niu Sina mo ni tagata e galulue faavaitaimi ia latou galuega.
O Stowers o ia foi o se sui faavae o le polokalame 13 Aso o le Kerisimasi lea e faagasolo e le Ekalesia Faapotopotoga Kerisiano Samoa a le Puaseisei i Magele Sasae, o se polokalame ua mafai ona autasia uma ai ekalesia eseese aemaise lava i tupulaga talavou.
O se tamalii e taulamua e tuu atu lona aao e fesoasoani i sailiga seleni a aulotu, aoga ma kalapu taalo. Ua tulai mai foi lenei tamalii e lagolagosua ma faasoa lana fesoasoani e uunaia ma toleni le aufaipisinisi talavou Samoa o loo iai i totonu o Aukilani.
Toeolesulusulu Melegalenuu Ah Sam (MNZM)
O le faletua, le tamaitai faiaoga le afioga ia Toeolesulusulu Melegalenuu Ah Sam, ua iloga lana tautua matavela sa faatino ma o loo faatinoina pea mo le uunaia ma faatāua aoaoga tau gagana a le Pasefika.
O Melegalenuu o loo galue nei o le Pule Lagolago poo le Deputy Principal mo le Kolisi a Magele. O ia lea na faavaeina le vasega e aoaoina ai le gagana Samoa i totonu o le kolisi; mulimuli ane sosoo ai ma le aoaoina o le gagana Cook Islands Māori ma le Lea Faka-Tonga.
O ia o le sui faavae ma o le pule sili o le Fotu o Malama, o le Faalapotopotoga mo Faiaoga o le Gagana ma le Aganuu Samoa i totonu o aoga maualuluga ma aoaoaga faaiunivesite.
O ia o le sooupu autu mo le fata poo le stage a Samoa ma o se sui auai o le komiti faamaopoopo ma le Trust Board mo le ASB Auckland Polyfest.
O le afioga foi ia Melegalenuu o ia o le Teutupe a le Ekalesia EFKS New Zealand New Vision.
